الرئيسية / WhatsApp / شيبات الملك ..

شيبات الملك ..

علاء الذيب

ميديا نيوز – اول مره انبعثت صورة الملك على قروب شبكة اعلامي الاردن ، فكرها البعض وانا منهم انه تم دبلجتها على تطبيق faceapp ، حتى انا حكيت انه الصورة مش حقيقية ، لانه الشيب معبي راسه ، ولحيته ، والتعب والارهاق الي مبين على الملك خلاه اكبر من عمره ب 20 سنة ..

طبعا ، بدي احكي شوي اذا سمحتوا ،وكلامي مش تسحيج ولا تطبيل ولا تزمير ، بس الواقع هو الي بحكي ، وخاصة انه الاغلب نشر الصور ، وكتبتوا عليها كلمات معبرة عن الي جواتكم.

ملك بتحمل مسؤولية 11 مليون شخص على ارضه ، وقاعد بتابع كل صغيره وكبيرة ، وهو مسافر بتلاقوه فاتح مواقع التواصل الاجتماعي وبتابع الاخبار ، وهمه بالاول والاخير الامور تكون بخير .

انا وانتوا منفكر الملك اذا راح يوخذ اجازة ، يعني بكون مبسوط ، والحرس والحشم حويلاه ، لا بقدر يوخذ راحته ، ولا بقدر يطلع لحاله يتصور صورة سيلفي مع اولاده ، وهذا اشي طبيعي كونه اي ملك او حاكم معرض للاغتيال او يكون في حدا حاقد عليهم او تكون في دولة ما تسعى للتخلص من اي حاكم لانه مش ماشي على مزاجهم.

بس خلينا نكون واقعيين ، اذا واحد منا بده يطلع من الزرقا على عمان ، وبعدها بده يروح على الكرك والطفيله ، اخر الليل برجع تعبان وبوخذ اجازة من شغله يومين.

كيف الملك لعاد ، الي نفسي اعرف كيف برتب اموره ، وبطلع وبيجي باليوم 10 مرات ، وبلتقي بالناس في المحافظات وبالديوان ، وبده يحل مشكلة فلان وعلان.

اعطوني ملك ، بقعد مع طلاب الجامعات ، وبحكيلهم عن حياته وقصصه ، وشو بوكل وبشرب وشو بحب وبكره ، او اعطوني حاكم واحد مفرغ حاله للحالات الانسانية وبساعد هون وهناك .

الملك لما كان بالزرقا ، وموكبه مر وما شاف الطفل ابراهيم الخوالدة ، وشاف الفيديو بنفس اليوم وابراهيم بعيط ، ثاني يوم ناداه عالديوان وقله انا بعتذر منك يا بطل ، سامحني ما شفتك ، وامر بعلاجه ، ومبارح كانت اله اخر عملية عملها ، وقله بعد ما تخلص علاجك راح اجي ازورك في البيت.

اعطوني ملك ، بقعد مع عامل نظافة شاف صورته بتفرج على مباراة خارج الكوفي شوب لانه ما معه 3 ليرات يفوت جوا ، وجابه وقعد معه مع اهله واولاده.

اعطوني ملك ، بجيب شباب انقذوا حياة مواطينن داهمتهم السيول ، وبكرمهم ، وبعطيهم وسام الشجاعة.

اكيد الملك بده يشيب ، ويبين عليه التعب ، وبده يبين اكبر من عمره ، لانه شغال بدل الحكومات وبدل المسؤولين ، وبده يضل قلقان وتعبان عشان تضل البلد هادية وما في مشاكل.

والاشي الاهم الي بدي احكيه ، انه شفنا كيف الدول الثانية العربية والغربية بتتعامل مع شعوبها ، وكم واحد مات عشان طلع بتظاهر ، احنا باحداث الرابع الاخيرة ،الملك بعث ولي العهد وحكالهم سيدنا بسلم عليكم ، ووصى عليكم ، والدرك وزع مي وعصير على المتظاهرين .

شايفين كيف الطلقة الي بتطلع على المتظاهرين بالدول الثانيه ، بتطلع عندنا على وردة حمرا تعبر عن الحب ، وكاسة مي عشان صوت المتظاهر يصير اقوى واعلى.

ونكون صريحين اكثر ، الي بسب على اي ملك بدولة ثانيه ، بنحكم مؤبد او بنفوه ،احنا هون بنسجن كم شهر وبطلع وفي منهم ما بتوقف.

من الاخر ، عندنا ملك انساني ، بنحبه وبحبنا ، وكلنا جادين انه الفساد الموجود يروح ، عشان تصير بلدنا احسن بلد ..

نهاية ؛ شيباتك هذول حلوات ابو حسين ، لانهم طالعات لملك انساني بحت ، بهمة ناسه وشعبه ، خايف عليهم ، وخايفين عليه.

تعليقات فيسبوك

رأيك يهمنا ... تابعوا اخر الأخبار على ميديا نيوز

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.

x

‎قد يُعجبك أيضاً

أول جريمة في الفضاء… رائدة فضاء تتسلل إلى حساب زوجتها البنكي من المحطة الدولية

نيويورك – ميديا نيوز – أفادت التقارير بأن ناسا تحقق في ادعاء بأن رائدة فضاء ...

Translate »لأن لغة واحدة لا تكفي ميديا نيوز بكل لغات العالم